1. de "Quicumque vult salvus esse"

Operum bonorum messe

Premuniri est necesse

Iugo crucis et subesse

Quicumque vult salvus esse.

 

2. de redarguendo seipsum

Antiquatus in peccatis

Blando actu perpetratis,

Cursum vite brevitatis

Deviando tenui.

5

Eminus a via morum

Fovens scelus reproborum,

Grate turbam sociorum

Hostibus exhibui.

Iugum Xristi dulce sprevi,

10

Krisma annis abolevi,

Litis sepe verba sevi,

Mentis sensu carui.

Nuper tandem sum compontus,

Ope Dei corde pontus

15

Penitensque sibi iuntus

Quem olim deserui.

Redemptoris mater pia

Summi Regis, o Maria,

Tu sis mee vite via,

20

Vires dans spiritui.

Xristi regnum tam suave,

Ymber carens expers suave,

Zelo Dei pleno fave

Michi demum tribui.

 

3. de redarguendo seipsum

Com sim nimis impius culpis et obscenus,

Viciis, obnoxius, meritis egenus,

Sit michi propicius pietate plenus

Summi Patris filius, Ihesus nazarenus.

5

Qui de matre virgine statuit oriri,

Induens pro crimine mundi formam viri,

Sevo necis turbine voluit potiri,

Salvans a voragine nos averni diri.

Cuius ubi nobile nomen invocatur,

10

Animo terribile nichil aversatur;

Munus inefabile tandem postulatur

Qui per opus stabile sibi famulatur.

Igitur consideret suam quisque sortem,

Xristo se confederet per virtutem fortem;

15

Sic obstantem conteret hostium cohortem,

Cursus com aceleret temporis ad mortem.

Ipsum unigenitum imploremus Dei

Nobis ut per meritum matris sume spei

Det post carnis exitum iubilantes ei

20

Cernere continuum sancte faciei.

 

4. de "Bonos habent hic adversitates"

Non indigneris, quisquis celestia queris,

Si malus hic floret, si iustus turbine ploret:

Nam perfectorum non est omnino virorum

Hic exaltari, sed sterni, ludificari.

5

Expers celorum sic genus est reproborum,

Sic terrenorum sine parte fit ordo bonorum;

Mens igitur pura, preparans ad regna futura

Quod sibi contingant, hoc lecto munere stringat.

 

5. Iudex

Debito in propria debet persona citari

(Quod si non fecerit, erit excusatio nulla),

Presidis in sede, uel alius nobilis ede.

Que reprobentur ibi non debent certamina scribi,

5

Vt quod debetur iuris libramine detur.

Eius qui petitur propria persona citetur:

Si non sic agitur, non ipse citatus habetur.

 

6. de quirendo auxilium Dei

Quia legem preterivi

Et terrena concupivi,

Parce michi: iam perivi,

Xriste, filii Dei vivi!

5

A casu quo cecideram

Per te redemptus fueram;

Da michi viam liberam,

Sedens ad Patris dexteram!

Qui culpe sumus in chaos,

10

Tu, omnium virtutum pos,

Vt scandamus ad Superos,

Exurge, Xriste! Iuva nos!

 

7. de tribus Magis

Vt naciones singule,

Reges Tarsis et insule

Mentis afecti sedule,

Oferte Xristo munera

5

Per santitatis opera

Que virgo fert puerpera:

Aurum sacris in actibus,

Tur in orationibus,

Miram in culpe fletibus.

 

8. de "Quare fremuerunt gentes?"

Qum terrene frustra mentes

Vna lucra sint querentes,

Quibus fiant indigentes,

Quare fremuerunt gentes?

5

Tuo, Deus, verbo terre

Cum tenentes crucem terre

Pravitati, liti, guerre,

Astiterunt reges terre.

In hac vale pendula

10

Imminent pericula,

Quorum mente sedula,

Dirumpamus vincula.

Nos semper fugat dira nex;

Futuri sumus viles res:

15

Sit ergo nobis dux et lex

Qui habitat in celis rex.

Nostro passus pro amore,

Multo presus a dolore,

Iudicandis con tremore

20

Tunc loquetur in furore,

Dicens: - Olim fui mutus.

Nunc, ut cernam quod secutus

Fuit pius et versutus,

Ego sum rex constitutus! -

25

In spernentes sequi te

Obcechatos mundi re,

Iudicem posui te!

Dominus dixit ad me:

- Lex ut docet, crede sibi;

30

Sacrum pastum quere tibi;

Et ubi sum, tu sis ibi:

Postula et dabo tibi.

Evadas ut a framea,

Ad te vocantem remea,

35

Teque, cum sis res terrea,

Reges in virga ferrea.

- Viri, doctrinam capite

Et que sunt sursum sapite;

Quo sit eundum tramite

40

Et nunc, reges, intendite:

Vt quod scritura semino

Fructu redatur gemino,

Devote sine termino

Servite semper Domino.

45

Nunc subite disciplinam

Tamquam vite medicinam:

Ne fluatis in ruinam,

Aprehendite doctrinam. -

- Vir, ad Xristum cor regira

50

Cuius opera sunt mira;

Nam vindicta fiet dira

Cum exarxerit in ira! -

 

9. de "Sancta virgo Margarita"

Sancta virgo Margarita,

Mitis, clemens et perita,

Sponsa Xristo counita

Nexu vere fidei,

5

Tabe carens mente pura,

Conabatur iugi cura

Vt ad semper duratura

Posset regnat transvehi.

Marte duro diversorum

10

Pressa fuit tormentorum;

Dona, minas tiranorum

Reprobavit penitus.

Gazis, ponpis et terrenis

Venenosa fraude plenis

15

Spretis, sua dans egenis,

Igne Sancti Spiritus,

Rivo fontis graciarum

Mens inbuta, nil armarum

Retis sentit vel penarum,

20

Spirans ad celestia.

Tali tanto sponso data,

Mente constas illibata,

Hanelabat ad parata

Summi regis gaudia.

25

O puela felix, munda,

Tu, virtutibus fecunda,

Nobis loca tam iocunda

Da post carnis exitum!

Rationes extra limen,

30

Evagamur propter crimen

Nos seducens ad discrimen

Penas et interitum,

Prono fluxu iam labentes

Ad gehenam, contempnentes

35

Iussa Dei, nec paventes

Divinum iudicium.

Nobis, virgo celo sita

Et a Deo exaudita,

Confer, pie, exquisita,

40

Quid sis necessarium.

Bisso fulgens et hornatu,

In festivo celebratu,

Nos sanctorum comeatu

Da frui quam cicius.

45

A te nobis, ut optatur,

Munus Xristi conferatur:

Eius visu conlegatur;

Nil foret iocundius.

 

10. de utilitate et condicione nostra

Cum sis, omnis caro, fenum

Et post fenum fiat cenum,

Homo, quid extoleris?

Cerne quid es et quid eris:

5

Modo flos es, sed verteris

In favilam cineris.

Terram teris, terram geris

Et in terram reverteris,

Qui de terra sumeris.

10

Homo, ditus es ab ymo:

Cito transis, quia fumo

Similis efficeris,

Numquam sub eodem statu

Permanens dum sub rotatu

15

Vite huius volveris.

Per etatum incrementa

Ymo magis detrimenta

Ad non esse traheris.

Sicut umbra con declinat,

20

Vita fugit et festinat:

Claudit meta funeris.

O sors gravis, o sors dura,

O lex dira, quam natura

Promulgavit miseris!

25

Homo natus con merore,

Vitam ducis cum labore

Et cum metu moreris.

Ergo si sis qualitatem

Tue sortis, voluptatem

30

Cernis quare sequeris?

Memento te moriturum

Et post mortem id mesurum

Quod hic seminaveris.

 

11. de "Deus exaudi"

Deus, omnium creator

Contorumque moderator,

Cum sim reus et peccator,

Esto michi miserator.

5

In nomine tuo vero

Salvatoris de quo spero,

Corde puro si te quero,

Pie vivens, salvus ero.

Tuo regnans in ducatu,

10

Omni purga me reatu,

Cuius tuto comitatu

Celi fruar incolatu.

Salvum fac tuum popolum

Quem presens tenet seculum

15

Ne per ostile iaculum

Cadat in reciaculum.

Me fedatum putredine

Fuscatumque caligine

Illustra tuo lumine,

20

Emunda omni crimine.

Fac me ope tua dignum,

Qui baptismum fero signum,

Et, per crucis sacre lignum,

Dele quidquid est malignum.

25

Et cor meum tibi dica,

Vita ducens sub pudica;

In me tenebrosum mica

Cui lux fuit inimica.

In virtute quam fecisti

30

Quando mori consentisti

Natum tuum quem mixisti

Parce flenti, precor, isti.

Tua dextera me tuere

Quem sis omni vi carere

35

Et que tibi grata vere

Sint, dignare me docere.

Iudica me non secundum

Quod meretur cor immundum,

Sed tu quem sio habundum

40

Venia, fac me iocundum.

Me meritis exiguo

Tibi me totum tribuo

Vt munere melifluo

Decores me perpetuo.

 

12. de "Deus exaudi"

Deus, qui conta fecisti

Et per mortem Ihesu Xristi

Mundum totum redimisti,

Da solamen cordi tristi.

5

Exaudi, rex pietatis,

Nos gravatos a peccatis

Quos defendat a periatis

Dextra tue probitatis.

Orationem respice,

10

Celi regnans in vertice,

Ac servos tuos despice

Mente rogantes supplice.

Meam tibi nequitiam

Depromo petens veniam.

15

Si me repellis, quoniam,

Quo, derelictus, fugiam?

Auribus clementissimis

Subveniens miserimis,

Tuere, dux magnanimis,

20

Ab hostibus nos pessimis.

Percipe preces, quesumus,

Nostras, qui bono desumus;

Nam tibi, quantum possumus.

Iam famulari volumus.

25

Verba proferre nescio,

Corde confusus consio,

Sed ad te pium venio

Omni pleno consilio.

Oris, cordis et operis,

30

Molem depromo sceleris;

Sed vivam si perceperis,

Pie largitor muneris.

Mei crebra sunt vulnera

Que sanasti; mox impera

35

Regnaque salutifera

Nobis post mortem resera.

 

13. de "Domine probasti me"

Fac me, Deus nosse te

Tota mente, fide, spe;

Nam, seductum mundi re,

Domine, probasti me.

 

14. de sanitate redita filio centurionis

Xristus qui regis filium

Sanavit in Cafarneum,

A cruciatu febrium

Det se nobis propicium

5

Et optatum remedium

Contra febris incendium,

Vt per hoc beneficium

Sibi demus preconium

Toto conatu mencium

 

15.

Cum in hac die Veneris

Auctor humani generis,

Per mortem quam sustinuit

Solvendo quam non rapuit,

5

Dignatus sit redimere

De terro mundo carcere

Et neminem exceperit

Sed omnes liberaverit;

Nosque iubemus facere

10

Quod voluit instruere

Docti per evangelium,

Eius sequi vestigium:

Te, pater urbis, quesumus,

Non ignorans quod volumus,

15

Vt per eundem Dominum

Qui vult salutem hominum,

Quod postulamus illico

Des, sine preter aliquo,

Illis egressum miseris

20

Letum de sinu carceris,

Vt Redemptoris emulus

Sis et eiusdem famulus

Suique splendor luminis.

Sic tui dex regiminis

25

Tuum ducens introitum

Ad gloriosum exitum,

Et mundi post exilium

Det tibi celi gaudium.

 

16. de beata Virgine

"O miranda creatura,

Mater Dei, virgo pura,

Cunctis pulcrior figura

Veneranda facie,

5

Vite huius in presura

Esto pro me rogatura:

Tu me vulneratum cura,

Cum sis plena gratie.

In merore tuo stilla

10

Quo sit michi mens tranquilla,

Xristi humilis ancilla,

Imperatrix glorie.

Fac me, nitens o sintilla,

Ire Xristi post uexila,

15

Te iuvante, ut per illa

Fraus sit compos venie.

Hostem quemque procul pelle

Quo sit michi cor rebelle.

Quod vult Deus fac me velle

20

Per arma iusticie".

Ad instantis in procelle

Salvet ductus maris stelle,

Alme virginis puelle,

Dei matris proprie.

25

Gressu tendo qui proclivi,

Si ad metam (quod nesivi

Quali cursu) pertransivi,

Quante sunt miserie!

"Sed per matrem quam quesivi

30

Des te michi, quem sicivi,

Xristi, filii Dei vivi,

In celesti requie".

 

17. de quinque panibus et de duobus piscibus

Rex qui escam omnibus

Dat exurientibus,

Et qui de quinque panibus

Duobusque piscibus

5

Viros quinque milia

Pavit sui gracia,

Omnibus cibaria

Dans in abundantia,

Ipse nobis hodie

10

Prece matris proprie

Det in hac exurie

Panem sue glorie,

Quo refecti plenius,

Te Ihesu quam citius

15

Quo nichil est dulcius,

Fruamur superius.

 

18.

Ne coniungat morte reis,

Rex qui tuos ad te vehis,

Sit lex tua, quam pro eis,

Lucerna pedibus meis.

 

19.

Cum omne me teneat viciorum genus,

Quem sedusit etiam pudibunda venus

Sit michi propicius pietate plenus

Summi Patris filius Ihesus nazarenus.

 

19a.

Cum bene considero, scrutans mundum totum,

Nil a iuris tramite cerno sic remotum,

Irritum virtutibus, viciis egrotum,

Sicut secularium genus sacerdotum.

 

20. de quodam psalmo

Cur non dispono cor ad id

Quod dixit in psalmo David:

Rore celi perlustratus:

"Paratus sum, non turbatus"?

5

Ego autem sorde plenus,

Pauper nimis et egenus,

In terrenis excecatus,

Sum turbatus, non paratus.

Quem ad turbam perversorum

10

Trahunt funes peccatorum,

Malis tantis irecitus,

Legem Xristi sum oblitus.

Sed qui Xristi nomen gero,

De salute non despero,

15

Cuius opem, corde verso

Si requiram, salvus ero.

 

21. de beata Virgine

Salve, virgo virginum,

Alvo ferens dominum,

Nos a labe criminum

Cura iugi libera.

5

Turris ingens, hominum

Aufer molem criminum;

Mortis ante terminum

Ad iuvandum propera.

Rivus siciencium,

10

Inpendens solatium,

Alme pacis gaudium

Ope tua resera.

Regale sacrarium,

Alens Dei filium,

15

Precis tu permedium,

Regi nos confedera.

Omnibus tu speculum,

Nobile spetaculum,

Optatum da poculum

20

Baiulans ad sidera.

Iostorum vehiculum,

Subtrahe periculum,

Ad eterne pabulum

Mense parans munera.

 

22.-23.

Quis enarrare poterit

Si dicere voluerit

Quanta pro nobis fecerit

Divina clementia?

5

Beneditio patuit

Cum virgini se prebuit

Verbum, quo vox insonuit:

"Ave, plena gracia".

Claritas tunc exprimitur,

10

Cum natus Xristus promitur

Et nox in diem vertitur

Vt cedat miseria.

Sapientia claruit

Doctrina quam exibuit

15

Et moribus; et docuit

Pretendens insignia.

Et graciarum actio

Eiusdem fuit passio

Pro mendi lata precio

20

Et culparum venia.

Honor est resurrectio,

Extincto mortis gladio,

Vt ductos ab exilio

Statuat im patria.

25

Virtus fuit ascenssio

Motu peracta proprio

(Non alius suffragio)

Sed mira potentia.

Fortitudo fit celitus

30

Dum mititur Paraclitus

Qui lustrans corda spiritus

Dat loqui magnalia.

Dicamus ergo sedula

Voce sed sine macula:

35

"Deo per concta secula

Sit perhennis gloria!".

 

24. Super "Ave Maria"

Ave Xristi mater digna,

Mitis, clemens et benigna.

Nato tuo nos consigna

Ne laudemur re maligna.

5

Vere pacis officina,

Invocanti te propina:

Viciorum de latrina

Nos perducas ad divina.

Maris pressos a procella

10

In salutis pone cella;

Fac, celestis o puela,

Nos victores post hec bella.

Riga tu, suavis unda.

Corda nostra sicibunda;

15

Frui patria iocunda

Nobis post exilium da.

A delictis nos refrena,

Robur iuris et habena.

Pietatis fluens vena,

20

Vocata nostra fac serena.

Gratis prebens postulata,

Nulli dees invocata,

Mater Dei noncupata,

Orbe toto divulgata.

25

Cibo vite tu feconda,

Te poscentibus habunda,

Nos in caritate funda,

Fragrans rosa rubicunda.

A regali stirpe fusa,

30

Coram rege nos excusa

Ne, reatu circunclusa,

Mens ab hoste sit delusa.

Plebem, tua iugi cura,

Tuearis a presura.

35

Esto nobis, virgo pura,

Regnum Xristi paritura.

Nacione tu preclara,

Super omnes Deo cara,

Ex hac vita nos amara

40

Dignos visu Dei para.

Doce tua nos sophya,

Virgo dulcis, o Maria,

Operari que sint pia,

Cum sis vite lux et via.

45

Mira mater et miranda

Et pre conctis, veneranda,

Natum mulcens voce blanda,

Plebe tua pro salvanda,

Nusquam te poscenti lenta

50

Vel imitis, sed intenta,

Dans virtutis fondamenta,

Semper humilis inventa,

Tene, legis sub devota,

Visione, nostra vota,

55

Vt, nequitia remota,

Corda Xristo dentur tota.

Cum sis poli via recta,

Corda, purgans nube tecta,

Per te nobis sit detecta,

60

Celi requies perfecta.

Benedicta tu regina,

Regi summo nos inclina

Cuius trahat nos doctrina

Peccatorum de sentina.

65

Necis in extrema hora

Honestate tu decora,

Nos tuere sine mora

Et pro nobis semper ora.

Dicta nobis que dicenda

70

Et que nobis sint agenda

In die illa tremenda

Quando cuncta sunt movenda.

Tabet namque mens poluta

Et peccatis involuta

75

Nixi per te sit aiuta

Cuius ope fiat tuta.

Tu pre ceteris dilecta

Mater Dei preelecta,

Dat ut tibi mens subiecta

80

Famuletur mente recta.

In excelsis stabilita

Laude micans infinita,

Per quam mundo datur vita,

Esto nobis non oblita.

85

Muniatur mens egena

Per te, fructu vite plena,

Vt in summi regis cena

Luce sit digna amena.

Liberatrix opulenta,

90

Corda viciis detenta

Solve, nobis dans fomenta

Quibus virtus sit detenta.

Educ nos tu, labe munda,

Virgo prudens et feconda,

95

Nos custodiens circonda.

Rivus es de quo fluenta

Manant nobis incrementa

Et salutis indomenta

Procul absint ut tormenta.

100

Bustis plus quatriduana

Carne fetet mens prophana;

Sed tu, clemens et urbana,

Nos sic ulceratos sana.

Et tu, vite cum sis porta

105

Per quam salus est exorta,

Oberrantes per distorta,

Ad direta nos reporta.

Bella nobis inferenda

Aufer manu metuenda;

110

Nobis, mater reverenda,

Post hanc vitam requiem da.

Neca hostes, tu robusta,

Nos trahentes ad iniusta,

Vt peccatis mens honusta,

115

Te prestante, fiat iusta.

Dic et esto nos doctura

Quid plebs tua sit factura

Vt vitando nocitura,

Consequantur celi iura.

120

Tus, per quod sacrificia

Plus fiant rodolentia,

Es tu parens propicia,

Mira nitens fragrantia.

Fructuosa tu oliva,

125

Semper virens, uber, viva,

Nos ab omni malo priva

Et a febre recidiva.

Tus conscendens sublimia,

- Et, in figura propria,

130

Sublimi polens gracia,

Alta virtutum copia -,

Ventura fac nos ab ira

Et gehenne morte dira

Nos expertes, mater mira,

135

In quos semper te regira.

Tristes sumus culpa multa,

Vita steriles inculta,

Sed tu, pietate fulta,

Fac in nobis sint indulta.

140

Tu es virgo benedita,

Sola mater Dei dicta,

Per quam morti gens addita

Vite datur, morte vita,

Inter luces, tu lucerna,

145

Pandens tuis ad superna

Preces, nobis ut - materna! -

Regna dentur sempiterna.

 

25. de non eundo retro ad mundum

Qui per antrum tendimus tenebrose scrobis,

Pravis et adiungimur, non con viris probis,

Deprecemur iugiter ut innoscat nobis

Rex qui dixit: "Petite et dabitur vobis".

5

Mundus enim labitur ad deteriora;

Peccatorum vulnera fiunt graviora;

Semper fit propinquior dire necis hora:

Ad salutis comodum non est danda mora.

Invocemur igitur matrem graciarum

10

Que pro nobis mulceat natum tam preclarum

Vt nostrarum deleat sarcinam culparum

Nos consortes faciens opum eternarum.

 

26. de verbis devotissimis "Corpus Xristi"

Ave vivens hostia, veritas et vita,

In qua sacrificia cuncta sunt finita:

Per te Patris gloria datur infinita;

Per te stat ecclesia iugiter munita.

5

Ave vas clementie, scrineum dulcoris,

In quo sunt delicie celici saporis,

Veritas substantie tota Salvatoris,

Sacramentum gracie, pabulum amoris.

Ave manna celicum, verius legali,

10

Medicamen misticum morbo spiritali

Datum in viaticum misero mortali,

Vere dans catholicum vite inmortali.

Ave corpus Domini munus et finale,

Corpus vintum numini nobile locale,

15

Quod relinquit homini in memoriale

Com finalis termini mondo dixit: "Vale!"

Ave plenum gaudium, vita beatorum,

Pauperum solatium, honor misserorum;

Grande privilegium hoc est viatorum

20

Quorum sacrificium merces est celorum.

Ave virtus fortium ob viam ruine

Turis et presidium plebis peregrine,

Quam insultus hostium frangere non sine,

Salus te querentium, istic et in fine.

25

Hic Ihesus veraciter duplex in natura

Non est parcialiter nec solum figura,

Sed essencialiter caro Xristi pura

Latens integraliter brevi sub clausura.

Celo visibiliter caro Xristi sita

30

Forma panis aliter latet hic vestita;

Solus novit qualiter hanc qui ponit ita

Potestque faciliter virtus infinita.

Sumptum non consumitur corpus salvatoris;

Idem totum sumitur omnibus in oris;

35

Forma panis frangitur dente comestoris;

Virtus carnis fugitur morsibus amoris.

Xristus nichil patitur huius lexionis;

Forma panis solvitur vi digestionis.

Tunc si Xristus queritur est in celi tronis;

40

Sicut vult hinc tolitur: datur vite donis,

Hoc ardoris calculo venit nos ignire;

Hoc amoris stimulo frange motus ire,

Et eodem ferculo, qui nos vis nutrire,

Velis cordis vinculo fortiter unire.

45

Sic vult rex regnancium caritatis mire

Cibando fidelium imtima subire;

Moris est amancium invicem sitire

Vt archana cordium possint introyre.

O Ihesu dulcissime cibus salutaris,

50

Qui sic nobis intime tribui dignaris,

Mala nostra deprime fletibus amari

Et affectus inprime quibus delectaris.

Ihesus, vivens hostia, placa maiestatem;

Sacramenti gracia confer sanitatem;

55

Pauperum substantia dans eternitatem,

Domini memoria fove caritatem.

Vanitatem spernere fac nos consolator;

Hostes dona vincere, Xriste propugnator;

Et quod doces credere, Ihesu reparator,

60

Per te tandem cernere da, remunerator.

 

27. de planctu beate Virginis

Virgo, plorans filium ductum ad supplicium

Dicit: "Rex humilium, fili, quod fecisti?

Quia gens incredula blasfema, insedula,

Trait ad patibula et crucem subisti?

5

Ecce tua viscera que suscisti tenera

(Te lactarunt ubera mea, filii deus)!

Te in cruce video fixum clavis, mereo,

Pie filii, te fleo, dulcis amor meus.

Moreris et morior, pateris et patior,

10

Cruciaris: crucior; tecum volo mori,

Qui es meum gaudium, dans Iohanem filium,

Sed parvum remedium materno dolori.

Cerne matrem miseram, virginem puerperam

Quam in carne teneram tibi dedicasti:

15

Vt pupilam oculi te dilexi, protuli,

Qui peccata populi in cruce portasti.

Filii venerabilis, ante te sum flebilis;

Non est dolor similis sicut dolor meus.

Matrem tuam respice te inclinans vertice,

20

Filii Dei unice et dilecte meus.

Filii michi loquere, et me mori patere!

Qui me derelinquere, fili, vis iudeis?

Heu! Quia te peperi? quia hic me deseri

Et in carne conteri cerno fariseis?

25

Vadis, vera hostia, mortis ad supplicia:

Solus fers obprobia ad salvandas gentes;

Vbi Thomas Didimus, fortis Petri animus,

Qui dicebant: - Ibimus - mortem irruentes?

Sed tu plagas pateris manuum et lateris

30

Et tu solus duceris ad crucifigendum.

Ergo michi veniam da ut tecum veniam,

Quia hic deficiam, filii, ad te flendum".

 

28. de tribus partibus que fiunt de homine mortuo

Quando male moritur dives tripartitur:

Nam pletendus spiritus demoni largitur;

Caro fetens vermium morso demolitur;

Resque sicientibus natis despertitur.

 

29. de recomandacione a duabus Mariis

Salve coniunx nobilis viri Zebedei

Que Maria diceris soror matris Dei,

Cuius natus duplex est consobrinus ei

Iohanes et Iacobus, lux humane spei.

5

Generosa genitrix prolis tam preclare,

Com tam caro germine, Xristum deprecare

Vt que sibi grata sint det nos hic amare

Et per eius semitas semper ambulare.

Salve, soror altera virginis celorum,

10

Ex Alpheo quatuor mater filiorum,

Iude, Iosep, Iacobi Simonisque, quorum

Grata sit cognatio regi seculorum.

Vos due, matercere pii Salvatoris,

Cum tam claris genitis sacris et decoris,

15

Nos muniri precibus vestris, contis horis,

Quesumus et munere perpetis honoris.

Quidquid enim petitis statim obtinetis,

Nutum dum dominicum semper possidetis;

Sic pro nobis igitur pie suplicetis

20

Vt fruamur iubilo celice quietis.

 

30. de die extremo

Extremo in examine, cernens te venturum, Deum,

Cuius sum liber sanguine crucis tue per tropheum,

Tum tabesco formidine, me perpendens mortis reum!

In manus tuas, Domine, comendo spiritum meum.

 

31. de statu tutum regum defunctorum

Quam cito frangatur caro que sic magnificatur,

Vobis scire datur quid tumbe lingua loquatur:

"Viximus elati, regum de stirpe creati;

Nunc sumus hic strati, con vermibus intumulati.

5

Quod sumus, hoc eritis; et nos prout estis eramus;

Sed com pro meritis stipendia danda siamus,

Nunc celeres sitis ut agatis que bona sitis,

Ne non possitis operari quando velitis".

 

32. de beata Virgine

Nos, virgo, stella maris, ab hoste tuearis;

Sic nos intuearis ut non obliviscaris.

Tu, Xristi cella propria, nullius sordis conscia,

Nos sibi reconcilia: nostri reminiscaris.

 

33. de beata Virgine

Mater micans meritis, Maria marissima,

Miserere miseris, misericordissima;

Mentium mortifica mala multa maxima;

Mundi morbos medica, medere medissima.

5

Ave, amirabilis amoris accensio

Avocata anime, adfluens auxilio!

Abeat anbicio ab affectu anxio;

Ad amena adtrahat abluens aflicio.

Rationis regula, regale refugium,

10

Reproborum revoca reatum ruentium,

Ruinosum retrahe renisum regnantium,

Robur rompens remove regi resistentium.

Iniurias indica, iubar innocentie;

Iniquos iustifica intendentes impie;

15

Inimici iugiter intonant insidie:

Ipsum iuge iugula iaculo iusticie.

Aufer avidissimos actus avaritie;

Artes adversantium arceas astutie;

Ab aflitis amovens accidens angustie:

20

Atritos ad atrium aduc afluentie.

 

34. Cantione de beata Virgine
secundum sonum "De l'alegra montaninna"

Ave celi regina,

Regis eterni mater gloriosa,

Aiutrix virtuosa sine mora

Et omni prebens hora remedium.

5

Ave lux et doctrina preciosa,

Superne claritatis spes amena,

Per quam fit lex divina radiosa,

A nube cecitatis cor serena.

Aurem in nobis inclina,

10

Virtutibus et pietate plena,

Dulcore fluens vena copiosa,

Refulgens velut rosa vel lilium.

In te maiestas trina clausa sedit,

Divinitatis sede non relicta.

15

Mundo sancta vicina vitam dedit,

Mortalium refulgens morte vita.

Ad te, stella marina,

Clamamus flentes, virgo benedicta.

Nam culpa maledicta nos possedit,

20

Que dire mortis redit suplicium.

Emunda nos sentina, vite via,

In alvo matris Deo consecrata,

Evulsa culpe spina, nos sophia

Illustres, ut nitescat mens ellata.

25

Salutis medicina,

Desolatorum iugis avocata,

Beatos nos beata fac, Maria,

Sis nobis tutum, pia, refugium.

Ave felix conctarum creatura,

30

Creaturarum fortis armatura,

Tu sola dominarum virgo pura

Fuisti Creatorem paritura:

A sententia dura

Tuere nos ne tradat in obscura.

35

Fac nos quiete frui duratura

Vbi nulla presura vel tedium.

 

35.

Contarum decus virginum,

Spes, vita, salus hominum,

Ne nos sub mole criminum

Demergi paciaris,

5

Tua vigil presentia

Sit nobis in custodia:

Pietatis subsidia

Clementer largiaris.

Vite refulgens speculum

10

Quo illustratur seculum

Contra mortis periculum

Sis portus salutaris.

Celi regina curie

Divine venna gratie,

15

Nobis perhenne glorie

Coronam nanciscaris.